ស្វាយរៀង៖ អនុប្រធាន ទី ១ អាជ្ញាធរ មីន លោកទេសរដ្ឋមន្រ្តី លី ធុជ បានចាត់ទុកគ្រូបង្រៀន គឺជាឆ្អឹងខ្នងដ៏រឹងមាំ និងជាត្រីវិស័យដែលបានបង្ហាញផ្លូវយើងទៅកាន់ការចង់ដឹង ការចង់ឮ ផ្តល់ចំណេះដឹង និងមានប្រាជ្ញាវាងវៃ ព្រមទាំងជាផ្លូវបង្ហាញទិស ទៀនបំភ្លឺផ្លូវ ផ្តល់មិត្តភាព វិន័យ និងសេចក្តីស្រលាញ់ដល់មនុស្សគ្រប់គ្នា។

នៅក្នុងពិធីជួបសំណេះសំណាលជាមួយលោកគ្រូ-អ្នកគ្រូ នៅក្រុងបាវិតសរុបចំនួន ៣៦៣ នាក់មកពីសាលាចំនួន ២១ និងការិយាល័យអប់រំ យុវជន និងកីឡា ក្រុងបាវិតនៅព្រឹកថ្ងៃទី១៣ ខែកុម្ភៈ ឆ្នាំ២០២២ លោកទេសរដ្ឋមន្រ្តី លី ធុជ ប្រធានក្រុមការងាររាជរដ្ឋាភិបាលចុះមូលដ្ឋានក្រុងបាវិត បានថ្លែងអំណរគុណយ៉ាងជ្រាលជ្រៅ និងសម្តែងនូវការដឹងគុណជូនចំពោះការលះបង់ចេញពីបេះដូងទាំងកម្លាំងកាយ និងកម្លាំងចិត្តរបស់លោកគ្រូ-អ្នកគ្រូទាំងអស់ ដែលបានខិតខំបណ្តុះបណ្តាល និងបង្រៀនដល់សិស្សានុសិស្សដោយមិនគិតពីប្រយោជន៍ផ្ទាល់ខ្លួន ដើម្បីឱ្យយើងទាំងអស់ក្លាយជាមនុស្សល្អ បងប្អូនល្អ ប្តីប្រពន្ធល្អ និងប្រជាពលរដ្ឋល្អ។

លោកបានបន្តទៀតថា ការលះបង់របស់លោកគ្រូ-អ្នកគ្រូ គឺមានភាពវិសេស មានតម្លៃ មានសារៈសំខាន់ និងមានឥទ្ធិពលទៅលើជីវិតមនុស្សគ្រប់គ្នា។

លោកបន្តថាគ្រូង្រៀនជាអ្នកជំរុញទឹកចិត្ត និងជាអ្នកផ្លាស់ប្តូរជីវិតរបស់មនុស្ស ហើយភាពជោគជ័យក្នុងជីវិត និងភាពជោគជ័យរបស់ប្រទេសជាតិរបស់យើង គឺបានមកពីការចូលរួមរបស់លោកគ្រូ អ្នកគ្រូ ដែលជាស្ថាបនិកនៃក្តីសង្ឍឹម និងអនាគត សម្រាប់សង្គមជាតិមាតុភូមិរបស់យើង។

ក្នុងពិធីសំណេះសំណាលនេះ លោកទេសរដ្ឋមន្រ្តី បានប្រគល់នូវប័ណ្ណថ្លែងអំណរជូនដល់លោកគ្រូ អ្នកគ្រូទាំង ៣៦៣នាក់ ព្រមទាំងបាននាំយកមកនូវកាបូប និងថវិកាចំនួន ៥ម៉ឺនរៀលក្នុងម្នាក់ជូនដល់គ្រូបង្រៀនផងដែរ៕